Category: Yngriflokkar

Lísbeth, Heiður og Ingibjörg valdar í Afreksbúðir KKÍ og Kristals

Borgfirðingarnir Lísbeth Inga Kristófersdóttir, Heiður Karlsdóttir og Ingibjörg Þórðardóttir hafa verið valdar í Afreksbúðir KKÍ og Kristals 2019 sem fram fara í Origo höllinni að Hlíðarenda í Reykjavík dagna 8.-9. júní nk. Það var yfirþjálfari stúlkna í búðunum, körfuboltastjarnan Helena Sverrisdóttir, sem valdi hópinn en alls voru 52 stúlkur valdar til æfinga að þessu sinni, allar fæddar árið 2005.

Afreksbúðirnar eru undanfari U15 ára landsliðs kvenna og því mikill heiður fyrir Lísbeth, Heiði og Ingibjörgu að vera valdar. Þær hafa leikið með sameiginlegu liði Reykdæla og Skallagríms í 8. flokki í vetur og tekið góðum framförum. Þá æfðu Lísbeth og Heiður með meistaraflokki Skallagríms í vetur.

Allar eru þær úr uppsveitum Borgarfjarðar, Lísbeth frá Litla-Bergi í Reykholtsdal, Ingibjörg frá Húsafelli og Heiður frá Laugarvöllum í Reykholtsdal.

Við óskum stelpunum til hamingju með valið og góðs gengis í afreksbúðunum í júní!

Mynd: Frá vinstri Ingibjörg, Lísbeth og Heiður (Ljósmyndari Guðjón Guðmundsson)

Góð frammistaða hjá minnibolta stelpna í lokaumferðinni

Um síðustu helgi fóru fóru stelpurnar í minnibolta 10 ára og kepptu á lokamótinu á Íslandsmótinu í þeim aldursflokki.

Skallagrímur sendi tvö lið til leiks að þessu sinni en A-liðið keppti í A-riðli á meðan að B-liðið keppti í D-riðli.

Mótherjar A-liðsins að þessu sinni voru Ármann, Grindavík, Keflavík, KR og Þór Akureyri. Fyrirfram var veik von um að tækist að landa Íslandsmeistaratitlinum en þá hefðum við þurft að vinna alla okkar leiki og treysta á úrslit úr öðrum leikjum. Annað af þessu gerðist. Á laugardeginum byrjuðum við á því að spila á móti KR en sá leikur endaði 16-18 fyrir KR en sigurkarfa þeirra kom þegar 6 sekúndur voru eftir af leiknum. Næsta verkefni stelpnana var leikur gegn Grindavík en þar hafðist 18-14 sigur. Síðasti leikur laugardagsins var gegn liði Þórs Akureyri en endaði sá leikur með 6 stiga tapi 18-24 í framlengdum leik. Á sunnudeginum áttum við 2 leiki og byrjuðum gegn Keflavík en við töpuðum þeim leik 14-16 en Keflavík skoraði sigurkörfuna frá miðju þegar um 3 sekúndur voru eftir! Í síðasta leiknum spiluðum við svo við Ármann en þar hafðist sigur 29-10 í mjög vel spiluðum leik hjá okkar stelpum.

Mótherjar B-liðsins að þessu sinni voru Afturelding, Haukar c, Haukar d og Stjarnan c. Á laugardeginum spiluðu stelpurnar við Aftureldingu þar sem þær töpuðu 16-18 eftir hetjulega baráttu þar sem úrslitin réðust ekki fyrr en í lokin. Síðan var seinni leikurinn á laugardeginum gegn gestgjöfunum í Haukum c þar sem stelpurnar þurftu að játa sig sigraðar 20-32. Á sunnudeginum spiluðu þær síðan við d lið Hauka og hafðist sigur í þeim leik 18-12 í frábærlega spiluðum leik. Síðasti leikur helgarinnar var síðan spilaður við c lið Stjörnunar og þar hafðist sigur 10-6. Afrakstur helgarinnar því 2 sigrar og 2 töp og 3. Sætið í riðlinum raunin.

Það er ljóst að það er ekki langt á milli bestu liða í þessum aldursflokki og er mikilvægt að halda vel á spilunum á næstu árum. Framfarirnar í þessum hópi hafa verið stórkostlegar núna á þessu ári hjá öllum stelpunum. Þjálfari minnibolta 10 ára stelpna er Rúnar Ólason.

Almar valinn í Úrvalsbúðir KKÍ & Kristals

Skallagrímsmaðurinn Almar Orri Kristinsson hefur verið valinn í Afreksbúðir KKÍ & Kristals 2019. Í búðunum koma saman 54 strákar, fæddir árið 2005, sem hafa verið valdir af yfirþjálfara búðanna, Snorra Erni Arnaldssyni. Afreksbúðirnar eru undanfari að U15 ára landsliði Íslands og því mikill heiður fyrir Almar að vera valinn. Búðirnar fara fram 8. – 9. júní nk. í Origo-höllinni að Hlíðarenda í Reykjavík.

Almar hefur leikið í vetur með 9. – 10. flokki drengja hjá Skallagrími og tekið góðum framförum. Einnig hefur hann leikið með sameiginlegu liði Snæfell/Skallagrímur í 8 flokki í vetur.

Við óskum Almari til hamingju með valið og góðs gengis í afreksbúðunum í júní!

Aðalfundur 2019: Ný stjórn kjörin

Aðalfundur körfuknattleiksdeildar Umf. Skallagríms fór fram sl. mánudag í Hjálmakletti í Borgarnesi. Þar var ný stjórn deildarinnar kjörin en hana skipa:

Margrét Gísladóttir, formaður

Arnar Víðir Jónsson – tilnefndur af meistarflokksráði karla

Birgir Andrésson – tilnefndur af meistaraflokksráði karla

Guðmundur Smári Valsson – tilnefndur af meistaraflokksráði kvenna

Þórhildur María Kristinsdóttir – tilnefnd af meistaraflokksráði kvenna

Einar Árni Pálsson – tilnefndur af yngriflokkaráði

Kristinn Óskar Sigmundsson – tilnefndur af yngriflokkaráði

AÐALFUNDUR KÖRFUKNATTLEIKSDEILDAR 2019

Aðalfundur körfuknattleiksdeildar Umf. Skallagríms verður haldinn mánudaginn 6. maí nk. kl. 20:00 í Hjálmakletti, Borgarbraut 54 í Borgarnesi.

Dagskrá samkvæmt lögum aðalstjórnar Skallagríms:

1.     Formaður setur fundinn

2.     Kosinn fundarstjóri

3.     Kosinn fundarritari

4.     Fundargerð síðasta aðalfundar lögð fram til samþykktar

5.     Formaður gefur skýrslu um starfsemi á liðnu starfsári

6.     Gjaldkeri leggur fram og útskýrir áritaða reikninga deildarinnar sem síðan eru bornir undir atkvæði.

7.     Stjórnarkjör

8.     Önnur mál

 

Allir velkomnir!

Stjórnin

112 krakkar í körfuboltabúðum Arion banka og Skallagríms

Körfuboltabúðir Skallagríms og Arion Banka voru haldnar með pompi og prakt í Borgarnesi um síðustu helgi. Þar mættu 112 sprækir körfuboltakrakkar af öllu Vesturlandi og léku listir sínar undir stífri leiðsögn þjálfara og leikmanna meistaraflokka Skallagríms.

Gestaþjálfarar búðanna, Ólöf Helga Pálsdóttir og Finnur Freyr Stefánsson, slógu einnig í gegn hjá krökkunum og eru þeim kunnar bestu þakkir fyrir komuna.

Auk körfuboltaæfinga var krökkum í 5-10. bekk boðið upp á fyrirlestur frá Bergsveini Ólafssyni knattspyrnumanni þar sem hann leiðbeindi krökkunum á praktískan hátt um markmiðasetningu hvort heldur sem það sé í tómstundum eða skóla.

Við vonum að allir krakkarnir hafi fengið hvatningu til að halda áfram að æfa sig eftir helgina og yfirgefið húsið með bros á vör.

Gunnhildur Lind Hansdóttir ljósmyndari tók myndir frá búðunum sem skoða má hér að neðan. Þar sést körfuboltafólk framtíðarinnar leika listir sínar.

Tímamótasamkomulag um jafna skiptingu styrktarsamninga

Aðalstjórn körfuknattleiksdeildar Skallagríms ásamt meistaraflokksráðum karla og kvenna og yngri flokka ráði hafa undirritað samkomulag þess efnis að jöfn skipting verði á öllum styrktar- og samstarfssamningum sem deildin aflar hverju sinni.

Með þessu er tryggt jafnræði milli karla og kvennaliða Skallagríms sem og yngri flokka þegar kemur að úthlutun þess fjármagns sem aflað er frá styrktaraðilum.

Samkomulagið er í samræmi við ákvæði jafnréttisstefnu UMSB og áherslum Íþróttasambands Íslands í jafnréttismálum.

Um tímamótasamkomulag er að ræða því eftir því sem best er vitað er körfuknattleiksdeild Skallagríms með fyrstu íþróttafélögunum sem stígur þetta skref innan körfuknattleikshreyfingarinnar á Íslandi.

Aðalstjórn lýsir yfir mikilli ánægju með samkomulagið og skorar á önnur félög að huga vel að jafnréttismálum innan sinnan raða.

Bjarni, Eyjólfur og Bríet valin í lokahópa U20

Þrír Skallagrímsmenn hafa verið valdir í lokahópa U20 ára landsliða Íslands. Þetta eru Bjarni Guðmann Jónsson og Eyjólfur Ásberg Halldórsson í U20 karla og Bríet Lilja Sigurðardóttir í U20 kvenna.

U20 karla keppir í A-deild Evrópumótsins og fer keppnin fram í borginni Chemnitz í Þýskalandi 14. til 22. júlí. U20 kvenna keppir aftur á móti í B-deild Evrópumótsins sem verður haldin í borginni Oradea í Rúmeníu 7. til 15. júlí.

Þjálfarateymi mfl. karla stýrir U20 ára landsliði kvenna, þeir Finnur Jónsson aðalþjálfari og Hörður Unnsteinsson aðstoðarþjálfari. Þjálfari U20 karla er Israel Martin en honum til aðstoðar er Baldur Þór Ragnarsson

Geta má þess að í vor var Marínó Þór Pálmason valin í lokahóp U16 sem keppir á Norðurlandamótinu síðar í þessum mánuði.

Við óskum okkar fólki góðs gengis fyrir Íslands hönd í sumar!

Finnur áfram með meistaraflokk karla – Hörður verður aðstoðarþjálfari

Körfuknattleiksdeild Skallagríms hefur endurnýjað samning sinn við Finn Jónsson um áframhaldandi þjálfun meistaraflokks karla. Finnur hefur verið við stjórnvölinn í meistaraflokki frá ársbyrjun 2014 og leiddi liðið til góðs sigurs í 1. deild karla í vetur sem tryggði því sæti í Dominos deildinni næsta tímabil. Finnur, sem er Borgnesingur í húð og hár, var áður leikmaður meistaraflokks Skallagríms og hefur þjálfað frá því að hann lagði skónna á hilluna, m.a. kvennalið Skallagríms og KR. Þá hefur hann þjálfað yngri landslið Íslands og er í dag þjálfari U20 ára landsliðs kvenna. Auk þess að þjálfa meistaraflokk mun Finnur taka við þjálfun unglingaflokks karla.

Finnur Jónsson, aðalþjálfari mfl. karla.

Körfuknattleiksdeildin hefur einnig ráðið Hörð Unnsteinsson sem aðstoðarþjálfara Finns í meistaraflokki karla. Hörður er borinn og barnfæddur Borgnesingur og snýr því aftur heim í Borgarnes en hann var fyrir daga sína í þjálfun leikmaður meistaraflokks Skallagríms. Hann hefur undanfarin ár þjálfað yngri flokka hjá Sandvika Baskettballklubb í Ósló í Noregi með góðum árangri, en þar áður þjálfaði hann yngri flokka hjá Breiðabliki. Hörður var aðstoðarþjálfari Finns hjá úrvalsdeildarliði KR í Dominos deild kvenna tímabilið 2013-2014 og tók við sem þjálfari eftir að Finnur tók við karlaliði Skallagríms á miðju tímabili. Í dag er Hörður aðstoðarþjálfari Finns í U20 ára landsliði kvenna.

Körfuknattleiksdeild Skallagríms lýsir yfir ánægju með þessar ráðningar sem er fyrsti áfangi í undirbúningnum fyrir komandi tímabil í Dominos deildinni.

Hörður Unnsteinsson, nýr aðstoðarþjálfari mfl. karla.

Körfuboltabúðir

Körfuboltabúðir Skallagríms og Arion banka hófust í dag og standa yfir helgina. Tæplega 90 krakkar úr Borgarnesi, Hvanneyri, Skorradal, Akranesi, Grundarfirði, Stykkishólmi, Garðabæ og úr Reykholtsdal taka þátt í búðunum. Við erum virkilega ánægð með þáttukuna í þessum fyrstu æfingarbúðum sem við höldum í samvinnu með Arion banka í Borgarnesi.